KANDILA

KANDILA

ni Felipe Sullera Jr.

BSED-Filipino

Foundation University

Dumaguete City

Nang ako'y magkamalay

Liwanag mo'y bahagi na ng buhay

Init ng pagmamahal ang tangi mong alay

Madilim na bahay linagyan mo ng kulay.

Nagmula sa langit ang iyong liwanag

Inilawan ang buhay ng natatangi mong dilag;

Nang ika'y masindihan buhay ko'y anong liwanag

Kahit puso't kaluluwa abot ng iyong sinag.

Madilim kong pag-iisip pilit mong iniilawan

Mabago lang ang ikot ng aking kapalaran;

Kahit ang sarili'y sobrang nahihirapan

Handang magsakripisyo magliwanag lang ang dinaraanan.

Ngayon, daop kamay akong nananalangin

Nawa'y buhay mo'y lalong pahabain

Kalusugan mo'y sa Diyos hihilingin

Nang ang liwanag mo'y patuloy kong maaangkin.

Maraming salamat sa iyong liwanag

Pagiging malakas ko'y di natitinag;

Ako'y hinubog ng iyong sinag

Ikaw ang kandila nitong pusong liyag.